Vir Ornatissime,Cum pro ea, quâ Rem Litterariam foves humanitate, infantilia nostra conamina favore non vulgari respexeris 1 ; et Literis ad eruditissimum docteur Sylvius 2 conscriptis, singulares erga nos affectus significaveris : æquum duxit Societas Dubliniensis, et pro eo, quo ego fungor munere, necessarium habui, summæ quâ tantum Virum prosequimur observantiæ, hæc qualia qualia conari testimonia 3. Primam adhuc agimus Infantiam, et si quos edere contigit feliciores vagitus, nos nostraque tuis permultùm debere præconiis grato animo omnes agnoscimus ; et benè viximus, quibus aliquid tanti nominis Viro dignum concipere licuit, et qui perficiendo pares eramus. Rogas ut ad te nostra mittantur ; lubenter accedimus ; haud dubitantes nobis perinde eventurum, ut apud Indos mercaturam exercentibus, qui viles nugas auro nobiliore commutant ; tenuiora nostra tentamina utilioribus Orbis Litterati Inventis donabis. Cùmque ipse sis Scientiarum Artiumque fons et scaturigo, liceat nobis inde unum derivasse rivulum, unde omnes tam feliciter hauserunt. Ut summatim dicam, amicitiam, eamque perpetuam, offers, quam pergrato animo amplectimur ; et si quicquam ad utiliores Scientias promovendas fludia nostra votaque conferant, gratulabimur nobis subortam esse novam amicitiæ redintegrandæ materiam, quam sacram, et inviolatam nos servaturos uno ore vovemus omnes : ideòque nostri memor vive et vale, et habeas tibi officiis omnobus.Devinctissimum
