Eruditissimo, celeberrimoque suo Almeloveenio med[icinæ] doctori peritissimo, et philologiæ thesauris instructissimo s[alutem] p[lurimam] d[icit] Petrus Bælius
Tædet me supra modum Vir clar[issime] jejunitatis ingenii et facundiæ meæ cum hodie non valeam grates tibi persolvere dignas tum quod exemplar tam nitide compactum tuarum præclarissimaru[m] amœnitatum mihi transmiseris 1, tum vel maxime quod meum nomen extare volueris in limine syllabi plagiariorum. Haud equidem tanto me dignum honore existimo, fruar tamen quæ tua est insignis in me benevolentia, et victor volitabo per ora virum quacunque circunferetur tuus liber. Gloriosum sane jubar in me ex tuo sole transfundis cujus quoad vivam sensus gratissimo animo inhærebit. Plura de tuis egregiis cogitatis, et politioris literaturæ flosculis quando beabimur præsentia tua, quod brevi futurum polliceris, nec unquam tam cito continget quin serò contigisse mihi videndum sit, aventi majorem in modum tanti boni copiam. Vale Vir clarissime mei semper memor tui semper reverenter memoris futuri.
De epistola ad clar[issimum] Hyde 2 in utramvis aurem dormito ; eam probe curabo
Fac si placet ut scheda hic apposita brevi tradatur clar[issimo] domino Mey, et si quæ habeat respond[er]e quam primum cursore quotidiano mihi mittas 3.
Dabam Roterodami die 17 febr[uarii] 1694
A Monsieur/ Monsieur Almeloveen docteur/ en medecine/ A Tergou
