Lettre 979 : Gaspard de Masclary à Pierre Bayle

Pour satisfaire Monsieur à ce que vous desirez scavoir touchant Mr Aubertin [1] je vous diray que (si je ne me trompe fort) il estoit natif de Champagne et de Vitri-le-Francois, mais dans peu de tems je m’en pourray eclaircir[.] Que devant qu’avoir esté appellé pour l’Eglise de Paris, il estoit ministre en celle de Chartres en Beausse, où il estoit etabli depuis quelques années et estoit marié. Il avoit de ma connoissance quatre enfans, deux fils dont l’un estoit dans les commissions et emplois pour affaires de finance ; et l’autre qui est mort, a esté ministre à l’Eglise d’Amiens [2] estimé, et bien voulu par Monsieur le comte de Bar [3] qui en estoit lors gouverneur ; et deux filles l’ainée mariée hors Paris, et la seconde à Monsieur de Lussan apoticaire à Paris qui est mort et luy a laissé des enfans. M. Aubertin estoit une [ sic] hom[m]e de grande stature, le visage assez beau et plain, le poil chatain clair, tirant sur le blond, à oreilles decouvertes, et sembloit un grand prestre, estoit fort universel et d’aggreable compagnie et conversation, aymoit la promenade de la campagne, s’entendoit fort bien à l’agriculture, et à ce qui concerne les arbres fruitiers et particulierement pour elever de bons melons, aymoit la musique et avoit souvent de petits concerts chez luy. Il estoit dans les bonnes graces de Mr le duc du Vernueil lors abbé de S[ain]t Germain des Prez [4] qui estoit le / quartier où il demeuroit, et ce prince le retenoit souvent à manger à sa table. Dans le cours de son ministere, quelqu’un qui ne l’aymoit pas, quoyqu’il fût un tres bon homme, ayant fait un rapport à la Cour (lors y regnoit le card[inal] de Richelieu) qu’il s’etoit servi en chaire de quelques termes fort injurieux et offensifs contre l’Eglise rom[aine,] il fut pendant deux ans (si je ne me trompe) interdit de prescher, au bout desquels il fut restabli. Et vers sa soixantieme année il fut attaqué d’une fievre violente avec lethargie : ses voisins cath[oliques] rom[ains] qui l’aymoient, et auroient souhaitté qu’avant de mourir il eust changé de religion, s’en allerent au curé de S[ain]t-Sulpice et luy ayant supposé et fait entendre qu’ils avoient appris qu’il vouloit abjurer sa religion, et se faire cath[olique] rom[ain,] ce curé estant venu avec quelques uns de ses prestres et parroissiens en la maison dudit sieur Aubertin, le grand bruit qu’ils firent ausprez de luy, le tira de sa lethargie, et luy donna le moyen de declarer à ce curé, et à ceux qui estoient entrez avec luy dans sa chambre, qu’il / estoit fort eloigné des sentimens que l’on luy vouloit attribuer, qu’il ne vouloit point quitter la religion ref[ormée] dans laquelle il estoit né, comme l’estimant la bonne et veritable qu’il avoit enseignée, et preschée, que son intention estoit d’y perseverer et d’en faire profession jusqu’au dernier soupir de sa vie, asprez laquelle declaration, il retomba dans sa lethargie et sans plus parler mourut un jour ou deux asprez ; je scay ces faictz d’original, j’etois lors a Paris et pour ce qui est du lieu de sa naissance, quand j’en auray un entier et certain • eclaircissement, je vous le feray scavoir[.]

Je suis Monsieur votre tres humble serviteur
Masclary [5] Ce 8 may 1694

Pour Monsieur Bayle •